حصري بالدارجة .. جمال قشاو يكتب ل “طوب ناظور” دموع بلادي

بقلم : جمال قشاو

دموع بلادي قطرات مسكونة

على تراب لي عطانا البرد و السخونة

على التراب لي فوقو حگرونا

على أرض في يدين الشفارة مرهونة

على حكومة ملتحية ملعونة

استغلو الدين والأمية باش بحكمونا

صمكو لبلاد ردوها زيزونة

طالبنا بالتغيير الكرامة و يحترمونا

ناضو دارو لعكر فوق لخنونة

بالخطط والحسابات بغاو يمسحونا

فبلادي شلا تراب محرم عليا ؛ أنا مادرت لابرجلي لا بيديا ؛ نبغي نزور مدن تبكي عينيا ؛ أنا فبلادي ويتكرفسو عليا ؛كي البوليسي كي الديوانية ؛ أرضي ويقمعني ولد النصرانية ؛ فقلبي نار الكية ؛ فعيوني دموع سبتة ومليلية ؛ دازت قرون ومزال منسية ؛ حسهم مقطوع في اللقاءات الوزارية ؛ واش مقديتوش ولا كاين إن فالقضية ؛ياك گاع أراضي و أقاليم مغربية ؛ ولا كاين تمييز وعنصرية ؛ على حساب المناطق الأجناس والعرقية.

شوفو شوفو حالة لبلاد

لي ماتو من أجلها جيران آباء وجداد

واش نبكيو ونديرو الحداد

قريب يتقضى الصبر ويجف لمداد

قديتو تخوفونا بألف جلاد

منظنش تقدروتزرعو خوفكم فلولاد

يمكن رها خامدة وغير رماد

متقولوش نشفو رجلكم كيقطعت الواد

فالتاربخ عدة قصص

والعبرة من أقوام ثمود وعاد

حاجة عجيبة مكاينة لا فجوامع لا فكنائس ؛ لا فإنجيل لا فتحفة العرائس ؛ عروستان فالبحر النكور وبادس ؛ بغيت نفهم مبغيتش لغة الخشب والدسائس ؛ بغيت نزورهم قبل ما نموت يائس ؛بغيت نستمتع بالغروب فظهرهم جالس ؛ والشمس كذوب فالبحر فحال الذهب الخالص ؛ الجسم كيتسمى معاق إلى كان من عضو ناقص ؛ كيفاش الوطن محروم من عينيه وحنا كلشي ناعس.